وتاليها مع قلبك.. أنا ناقص وجع وجدان !!
دخيلك فض السيره.. تعبت أنزف معاناتي..
تعال ننهي الماضي.. ويكفينا نكون إخوان..
أبطوي صفحة العاشق..وأعيد أحسب حساباتي..
أنا المذنب وأنا المخطي وأنا الآسف وأنا الغلطان..
وليتك ياالزمن ترجع وأكفر عن خطيئاتي..
وأنا الجاني وأنا المجرم وأنا الغادر وأنا الخوان !!
وأنا أكبر غبي شفتك حديقه في مساحاتي..
ماعاد أقوى على الظلمه ولا أقدر على الكتمان..
أحس أنك خنقتيني!! وجت ساعة نهاياتي..
ياوجه الله ياوجه الله..ياوجه الله بشر!! إنسان!!
على بالك حجر جامد!! أجل وشهي كتاباتي؟!..
نسيت ساعة اللقياء؟! نسيت لمة الأحضان!!
نسيت وش كثر كنت..تموت من لقاءاتي..
نسيت دفتر أشعاري..نسيت أعذب القيفان..
نسيت والقلم يكتب قصايد من عذاباتي..
نسيت من رفع قدرك وخلى لك مكان وشان!!
وعزيتك وعليتك وخليتك أعلى إعتقاداتي..
تغيرت ولاعدت مثل أول زهر عطشان!!
وحناني للأسف كنه بقايا من خرافاتي..
تكبرت وتجبرت..وصارت شوفتك سلطان!!
وأنا أهبل على النيه ماغير أرسل جواباتي..
أقول بخاطري يمكن تغير عنده العنوان..
ياولد اسكت متى تفهم!!صحيح إنه وهم ذاتي..
حسبتك مني وفيني.. وأهمك لو أجي فرحان..
ولكن شفتك بعيني تصد إبتساماتي..
حسبتك تفتح قلب إذا كان الغلاااا زعلان!!
ولكن ماكذب خدي وهو يشهد بكاءاتي..
فراقك أصبح الغاية ولاني على الهجر ندمان..
قراري بالبعد عنك ترى أسهل قراراتي..
وداع الذال ياذلي وداع الموت والأكفان..
عطيتك قلبي وروحي ولاصنت أماناتي..
وش الحيله إذا فكر قتيلك يهجر الأوطان..
طلبتك زيد الطعنه أبي أشعر بنوباتي..
وعلشاني إذا باقي بداخل حضرتك إيمان..
أبيها من ورى ظهري وأنا أتلو صلاواتي..
وخنجر طعنتك يصرخ ضحية الوفاء خسران..
وأنا آخر حكي عندي.. فمان الله ياطعناتي..
يامن تقدر تعوضني عن الضيقة وعن الأحزان!!
بشرط إني أنا الكوكب وأنت أبعد مجراتي..
يامن تقدر تخليني كبير أعظم ملوك الجان..
خلاص بذمتي والله ماعاد أرجع إلى الأدمان!!
عرفت إن الغدر واحد وأنا أجمع علاماتي..
صفر طيبي..صفر صدقي..صفر مابقى إنتهيت إنسان!!
صفر شعري وأقلامي وممحاتي ومبراتي..
صفر ليلي..صفر ويلي..صفر خافق نطر سهران!!
صفر دمعي..صفر شمعي..صفر بوحي ونبراتي..
صفر شوقي.. صفر عشقي..صفر مغرم..صفر ولهان!!
صفر وجدي..صفر شهدي..صفر نوحي وزفراتي..
بعد كل العمر هذا عرفت إني أنا الكسلان!!
حسافه جتني متأخر مراحل إكتشافاتي..
فمان الله ياالقلب اللي تعب وهمان!!
وحسافه ينوجد رجال يشوف أحرف معاناتي..
قصيدي لاتواخذني.. مصيري أبعد الشيطان!!
ويكفيني أذكر اسم الله..وأبعد عن تفاهاتي..
موضوع: وتاليها مع قلبك ؟!! 
الثلاثاء يناير 12 2010, 16:03
