السبب, الله..., رسول, عذرا, نحن
عذرا رسول الله... نحن السبب
مش عارفة أبدأ كلامي منين ولا ازاي
لكن هتكلم من قلبي والكلام اللي هيجي على بالي هأقوله من غير تنظيم ولا ترتيب
ليه كل شوية نلاقي حد بيتجرأ على حبيبنا ورسولنا وقدوتا وشفيعنا محمد صلى الله عليه وسلم ؟
وننقسم قسمين
قسم يقول مش هينقص حاجة من قدره عليه الصلاة والسلام واحنا عارفينه ومش هيأثر الكلام ده فينا وياخدوا
الموضوع عادي
وقسم بينزل مواضيع ويكتر الكلام وازاي يعملوا كده وممكن يبكي ويزعل ويكتئب
لكن كلنا بننسى السبب الأساسي لكل ده
وهو احنا
ايوه متستغربيش
السبب فينا احنا مش في اللي تجرأ وعمل كده
احنا السبب لما اصبح حبنا لرسولنا صلى الله عليه وسلم مجرد كلام
متستغربيش ولا تزعلي مني
خليك معايا للآخر
لما بتقول لواحد اعمل كذا علشان تاخد أجر ترد عليك وتقولك هو فرض ولا سنة ؟
طبعا علشان لو سنة يبقى مش مهم تعمله
لما بتقول لواحد ده رسولك قال لعن الله النامصة والمتنمصة تقول بس في ناس بيقولوا ينفع للزوج
نقولك ده راي ضعيف وخلينا في الأحوط تزعل منك
لما بتقول لواحد انت لي في كل حاجة بتتبع الرأي الضعيف المرجوح تقول أصل الدين يسر
مش بتحاول تتعب نفسها رغم ان الأمر مش متعب علشان تعمل الأفضلاللي يرضي ربها ورسولها
لما بتقول لواحدة حبيببك بيقولك اتحجبي تقول أنا لسه صغيره لما أكبر شوية وأتجوز
هأقول ايه ولا ايه ؟
بالله عليكم كده نبقى بنحب رسولنا؟
منضحكش على نفسنا
إن المحب لمن يحب مطيع
اللي بيعملوا كده لو حسوا لحظة اننا متمسكين بسنة نبينا صلى الله عليه وسلم واننا كلنا على قلب رجل واحد
بالفعل مش بالكلام
وعرفوا اننا مش هنسمح بجد لحد يتكلم كلمة عنه مكانوش عملوا كده
لكن
شافونا بنتخانق مع بعض وبنقول ازاي نبقى دولة اسلامية
شافونا بنتخانق مع بعض ونقول العري رسالة سامية ازاي نقول ده غلط
شافونا بنتصيد الأخطاء للشيوخ وندافع عن التحرر وحرية الرأي حتى لو بالسب ونشر الشائعات وهدم الأمة
شافونا لما عملوا كده قبل كده كل واحد قال كلمتين ونزل دمعتين وانتهى الموضوع على كده
المشكلة فينا احنا قبل ما تكون فيهم
لو كنا بنحب رسولنا صحيح كنا اتبعنا سنته
لو بنحب رسولنا صحيح مكناش حاربنا تطبيق الشرع الذي جاء به
لو بنحب رسولنا صحيح مكناش قلبنا الدنيا خوفا من كلمة دولة اسلامية
لو بنحب رسولنا صحيح هنتجنب ما نهى عنه من غير تردد
لو بنحب رسولنا صحيح هنعمل كل اللي امرنا بيه اول ما نعرفه من غير تردد
لو بنحب رسولنا صحيح مكناش نقول الرسول بيقول كذا نلاقي حد بيقول بس الدكتور الفلاني ولا الشخص
الفلاني ولا الكاتب الفلاني ولا رئيس الحزب الفلاني بيقول كده
لو بنحب رسولنا صحيح مكناش هيبقى فيه رشوة ولا غش وكنا حرصنا على أكل الحلال مش الغالبية تروح
تمضي وتمشي من الشغل وتقول على قد فلوسهم
لو بنحب رسولنا صحيح مكانش فيه عقوق ولا ظلم ولا سوء أخلاق ولا تحرش ولا المناظر اللي بنشوفها في
الشارع والثنائيات اللي ماشية مع بعض من غير حياء
وكفاية نروح القضايا الساخنة بس علشان نعرف مدى انتمائنا لدينا من المواضيع اللي بتتكتب هناك والهجوم
أحيانا على كل ماهو اسلامي
قبل ما نحاسبهم لازم نحاسب نفسنا الأول
ياترى لو الرسول صلى الله عليه وسلم جه دلوقتي وشاف حال المسلمين هيقول ايه ؟
وانت هتعمل ايه ؟
ياترى هيفتخر بينا ؟
وانتي هتوقفي فرحانه تقوليله أنا عملت كل اللي أمرني بيه
وشوف حجابي ازاي وأخلاقي ازاي زي ما امرتني بالظبط
ولا هتجري تستخبى علشان ميشوفشي اللي احنا عاملينه
عذرا يا رسول الله
تعبت وأوذيت علشان توصل لينا الاسلام واحنا بنفرط فيه يوم بعد يوم الا من رحم ربي
عذرا يا رسول الله
لو كان اللي حوالينا حاسين اننا بنحبك وهندافع عنك بجد مكانوش عملوا كده
عذرا يا رسول الله
لو كنا بنحبك بجد ماكنش ده بقى حال المسلمين
لو عايز ده ميتكررش
لو عايزة تنصري نبيك بجد
لو عايزة يبقى شفيعك يوم القيامة
لو عايزة تبقي معاه في الجنة
لو بتحبيه بجد وعايزة تنصريه
يبقى لازم تنفذ أوامره وتجتنب نواهيه
يعني بالفعل مش بالكلام
موضوع: عذرا رسول الله... نحن السبب 
السبت سبتمبر 15 2012, 18:58
