سالفة عشاق!!!

من بغى الفرقا لقى له عذر .. واسباب.. ودليل
خل عنك العذر والاسباب.. دام الحب ضااع

كان ودك بالفراق.. ابشر عسى عمرك طويل
لاترددوانت لك كلمه..ولك امر مطااع
لي عليك انك بكلمه تشفي الغليل
ولك علي اني لأوقف وقفة رجال شجاع

لاتجاملني مخافة (قال)مدري خوف (قيل)
عمر(هرج الناس) مايسمن ولا يغني جياع

كان قصدك (سر حبك).. اوعدك لاصبح بخيل
واحمل اسرارك معي للمووووت قدر المستطاع

بس قلها..قل مااحبك..وابشر بصبر جميل
لاتحسبني مثل من طبعهم لوي الذراع

صاحبك ماهو كذاا ياصاحب القدر النحيل
صاحبك طبعه غريب وغربته غربة طبااع

فـ الهوى مايقبل الحل الوسط.. ولا القليل
مثل ماهو لاشرى يشري..وليامن باع باع

ثابت لو هي تميل الارض حدره...مايميل
يدري ان الفقر ماهو عيب..والدنيا متاع
ماعشق لذة حياته..كثر عشق المستحيل
ولاكره حتى مماته..كثر كره الانصياع

كم تعلم من شديد البدو...وش معنى الرحيل
وكم تعلم من غروب الشمس.. وش معنى الودااع
وكم تعلم من سحاب الصيف ..وش معنى الحصيل
وكم تعلم من ليال البرد..وش معنى الضياع

ايه انا هذا طريقي (موحش..وصعب..وطويل)
وانت لامنك تعبت..العالم فجوجه وساااع

اعتبرني في بداية سكتك عابر سبيل
ورح وانا وقلبي معك من وين وجهت الشراع

يكفي اني لاذكرت فـــــ سالفة عشاق ... قيل:
عاشر احبابه شجااع.. وفارق احبابه شجااع